«Անհայտի լուսավորումը...»
ՄՍԿՀ սովորողների այցը CANDLE( սինքրոտրոնային հետազոտությունների ինստիտուտ՝ նշում ենք Լույսի միջազգային օրը):
Իսկ դուք գիտե"ք․․․ 2017 թվականից ՅՈՒՆԵՍԿՕ-ի նախաձեռնությամբ մայիսի 16-ին նշվում է Լույսի միջազգային օրը։ 1960 թվականին աշխարհում առաջին անգամ այս օրն է անցկացվել լազերի հաջող ցուցադրումը, որն իրականացրել է ֆիզիկոս և ինժեներ Թ. Մայմանը։
Դիտեք նաև՝ International Day of Light Armenia
Հունիսի 9-ին՝ Լույսի միջազգային օրվան նվիրված տոնակատարության շրջանակներում, CANDLE ընկերությունը կազմակերպել էր ՄՍԿՀ Միջին և Ավագ դպրոցի սովորողների այցը գիտահետազոտական ինստիտուտի լաբորատորիաներ՝ «Անհայտի լուսավորումը» խորագրով ամենամյա միջոցառմանը:
Լույսի միջազգային օր 2021-ը ՅՈՒՆԵՍԿՕ-ի համաշխարհային նախաձեռնություն է, որի շրջանակներում CANDLE- ը Հայաստանի ազգային հանգույցն է: Այն բարձրացնում է համաշխարհային իրազեկությունը գիտության և տեխնոլոգիայի կարևորության վերաբերյալ այնպիսի ոլորտներում, ինչպիսիք են հաղորդակցությունը, կայուն զարգացումը, կլիմայի փոփոխության դեմ տարվող պայքարը և առողջապահությունը:
Այսօր «Մխիթար Սեբաստացի» կրթահամալիրի ավելի քան 20 սովորողներ դարձել են այս իրական լուսային տոնակատարության այցելուները: Մեզ ողջունեց CANDLE տնօրեն Բագրատ Գրիգորյանը, ով խոսեց լույսի ծագման և աղբյուրների, ինչպես նաև մեր առօրյա կյանքում դրա կարևորության մասին:
Այս օրվա համար պատրաստվել էր մի ամբողջ համալիր ծրագիր: Շրջայցի մեկնարկին ցուցադրվեցին մի շարք կարճ տեղեկատվական և ուսուցողական տեսանյութեր լույսի կիրառման վերաբերյալ: Այնուհետև, կրթահամալիրի սաների համար կազմակերպվեց էքսկուրսիա՝ ցույց տալու ինստիտուտի հետազոտական լաբորատորիաները, և թե ինչպես են գիտնականների կողմից իրականացված աշխատանքները ներգործում մեր առօրյա կյանքի վրա: Սովորողներն այցելեցին նաև ԱՐԵԱԼ էլեկտրոնային արագացուցչի համալիր և ԴԵԼՏԱ լաբորատորիայի էլեկտրոնային սկանավորող մանրադիտակի և միկրոմշակման կայաններ, որտեղ ծանոթացան արագացուցիչների և լազերների աշխատանքային հիմնական սկզբունքներին: Ցուցադրվեցին նաև մի քանի ուշագրավ փորձեր ներքին արտացոլման և օպտիկական ալիքների ուղեցույցների, ֆոտոէլաստիկության և վակուումային պալատի իոնացման վերաբերյալ, ֆերոմագնիսական նյութերի ստացում այրման ռեժիմում և վերջում շրջայց դեպի AREAL արագացուցիչ:
