Ինքնուրույն անցնում ենք ճանաչման մե՛ր ճանապարհը…
Ամենաարտասովոր ու հետաքրքրաշարժ ուղղություններ՝ օդագնացություն, ավիացիա, աստղագիտություն և տիեզերագնացություն, ծանոթացում ամեն տեսակ թռչող սարքերի, դրանց աշխատանքի սկզբունքի ու ստեղծման պատմությանը, ամենատարբեր տիեզերական մարմինների, դրանց հետ կատարվող պրոցեսների և ընդհանրապես ողջ Տիեզերքի հետ:
Անցած շաբաթ «ԱՅԱՍ» Տիեզերագիտական ընկերության ղեկավար Ավետիք Գրիգորյանի հրավերով մեր «Աստղագետ-ֆիզիկոս» ընտրության խմբի 7-րդ դասարանի սովորողներով ներկա գտնվեցինք «Քվանտ» վարժարանում գործող տիեզերագիտական խմբի պարապմունքին: Այստեղ նույնպես, ինչպես և մեր պարապմունքներին, ազատ, հետաքրքիր զրույցի ձևով անցկացվող հանդիպումների ընթացքում սովորողները անցնում են ճանաչման այն նույն ճանապարհը, ինչ որ անցել է մարդն այդ բնագավառներում՝ քարե դարից մինչև մեր օրերը: Սկսում ենք ամենապարզ, առօրյայից հայտնի պատկերացումներից, քայլ առ քայլ գալիս ու, ամեն ինչ լիովին հասկանալով, հասնում բավական լուրջ գիտելիքների: Իսկ մեր սովորողից պահանջվում է միայն հետաքրքրություն:
Հուսով ենք, որ համագործակցությունը շարունակական կլինի, և մեզ համար նոր հնարավորություններ կստեղծի՝ նպաստելով այդ ոլորտում առավել շոշափելի զարգացումներին:
